Сэмэн уонна Софрон Даниловтар ааттарынан Духуобунас киинэ-Олоҥхо дьиэтэ
Сааскы кэрэ күннэр саҕаланыылара, кулун тутар 3 — 6 күннэригэр XVI Өрөспүүбүлүкэтээҕи, өбүгэ ииһин — ууһун таптааччылар, тарбахтарыгар талааннаах имэҥнээх иистэнньэҥнэр, чаҥкыйар кыстыктаах уһаарыылаах тимири, уйгу чороонун ыллатар мас уустарын, тойон туостуур иһити, мандар оҕуруо анньар мааны көмүс уустарын, аас далбар сөрүөһүттэр, ураты бэлиэ күннэрэ, быыстапка — дьаарбаҥка Туймаада Эбэ Хотун киэҥ киэлитигэр ыытылынна. Горнай улууһуттан барыта «Якутия мастеровая» быыстапка дьаарбаҥкаҕа 17 маастар, «Узоры народов России» панно оҥоруутун күрэҕэр 1 маастар, «Битва клинков — Бастыҥ Кылаан» күрэҕэр 2 маастар, X үбүлүөйдээх сэлэлии хаамыыга 30 киһи кыттыыны ылла. Быыстапка — дьаарбаҥка ыытыллар 13 көрүҥүттэн биһиги маастардарбыт 6 көрүҥэр кыттан ситиһиилээх буоллулар. Направление: «Резьба по дереву» — диплом II степени Сидоров Самсон Иванович (Атамай нэһилиэгэ), «Кузнечное дело» — диплом в номинации «Кованые ножницы» — Күн Дьөһөгөй Үрдүк Өрөгөй (Бэрдьигэстээх), диплом в номинации «Кованые колокольчики» — Платонов Альберт Вячеславович (Бэрдьигэстээх), грамота в направлении «Обработка кожи и меха» — Эверстова Екатерина Петровна (Горнай улууһун «Норуодунай маастара», Одуну нэһ.), грамота в направлении «Кузнечное дело» — Афанасьев Петр Петрович (Бэрдьигэстээх), грамота в направлении «Керамика» — «Күбэйэ» гончарнай студия. Салайааччы Даайа Моруот Хонооһой кыыһа. Маны тэҥэ талааннаах маастарбыт Айталина Санникова «Узоры народов России» панно күрэҕэр 20 кыттааччыттан 5 бастыҥнар истэригэр киирэн үөрүүбүт үксээтэ. «Битва клинков — Бастыҥ Кылаан» быһах күрэҕэр Альберт Платонов, Күн Өрөгөй 53 кыттааччы иһигэр киирэн ситиһиилээхтик кытыннылар. Үбүлүөйдээх сэлэлии хаамыы биһиги улууспутугар эмиэ ураты буолла. Ол курдук Виктория Аркадьевна Дьяконова дьиэ кэргэнэ «Саха» көрдөрөр — иһитиннэрэр хампаанньа быһа эпииригэр дьиэ кэргэнин кытта кыттыыны ылла. Виктория Аркадьевна дьиэ кэргэнин кытта сэлэлии хаамыы тэрээһин көхтөөх кыттааччыта буолар. Түгэнинэн туһанан Дьяконовтар дьиэ кэргэттэригэр улахан махталбытын тиэрдэбит. Күнтэн күн улууспут маастардара оҥорон, чочуйан таһаарар оҥоһуктара тупсан, көрүҥэ элбээн иһэриттэн астынабыт уонна махтанабыт. Быйылгы быыстапкаҕа сыл ахсын кыттыыны ылар дьоммут таһынан Мытаах нэһилиэгиттэн Надежда Семеновна Павлова, Айталина Петровна Спиридонова, Кировскай нэһилиэгиттэн Виктория Викторовна, Анна Петровна Мухоплевалар кыттыыны ылбыттара олус кэрэхсэбиллээх. Махтанабыт Күөрэлээх, Маҕарас, Кэптин, Бэрдьигэстээх Далбардарын түмэн илдьэ сылдьыбыт дьоммутугар Альбина Сапаргалиевна Султашоваҕа уонна Марфа Николаевна Федороваҕа. Күндү маастардарбыт, улууспут аатын ааттата сылдьар бастыҥ дьоммут эһигини ситиһии кыайыы көтөллөөх кэлбитинэн итиитик — истиҥник Духуобунас киинин — Олоҥхо дьиэтин аатыттан эҕэрдэлиибит. Эһиги хас биирдии айан, чочуйан таһаарар оҥоһуккут дьон сөҕүмэр махталын ыла турдун. Хас биирдиигитигэр чэгиэн доруобуйаны, өссө даҕаны айан — тутан эриэккэс кэрэ оҥоһуктары, төрүт үгэһи сөргүтэн үлэлии — хамсыы сылдьаргытыгар баҕарабыт.
