Сэмэн уонна Софрон Даниловтар ааттарынан Духуобунас киинэ-Олоҥхо дьиэтэ
Сарсыардаттан ох курдук оҥостон Сиинэ эҥэриттэн кэлбит улууспут тааһын кытта Сата тааһын үс оһоҕунан уһаардылар. Айылҕабыт да туран биэрэн бэртээхэй үлэ ыытылынна. Киэһээ хойукка диэри уһаараннар уопсайа бастакы оһохтон 4,7 кг, үһүс оһохтон 2,8 кг таҕыста. Барыта холбоон 7,5 кг таһаардылар. Хомойуох иһин иккис оһохтон мэлийдибит. Маннык түгэн эмиэ буолар. Бу уһаарыы түмүгүнэн Горнай улууһун территориятыгар баар таас үлэлиирин биллибит уонна эһэкээммитигэр махтанныбыт. Уустарбыт инники былааннарыгар Өрөспүүбүлүкэ тас өттүгэр тахсан үлэлэрин көрдөрүү, уопут атастаһыы буолар. Ол курдук икки бырааттыы дойдулар сөбүлэҥнэрин чэрчитинэн Татарстан Өрөспүүбүлүкэтин Казань куоратыгар Саха сирин маастардарын уус — уран оҥоһуктарын быыстапката ону тэҥэ атыыта ыытыллар. Манна Өрөспүүбүлүкэ маастарын кытта Горнай улууһун маастардара эмиэ кыттыыны ылыахтара. Үлэлэрэ алтынньы ыйтан саҕалаан ахсынньы ыйга диэри туруоҕа. Салгыы алтынньы ый 29 күнүттэн сэтинньи 2 күнүгэр диэри Аан дойдутааҕы «Клинок — традиции и современность» быыстапка — дьаарбанкаҕа тимир уустара Күн Өрөгөй, Альберт Платонов, «Тиһилик» түмсүү уонна Духуобунас киинин — олоҥхо дьиэтин уус — уран салаайааччыта Анастасия Васильева кыттыыны ылыахтара. Уолаттарбытыгар ситиһиини баҕарабыт.
