Кулун тутар 29 — 30 күннэригэр Дьокуускай куоракка, улуу Кыайыы 80 сылыгар анаммыт II өрөспүбүүлүкэтээҕи «Мас уустарын тойуга» бэстибээл — куонкурус ыытылынна.

Күрэххэ Нам, Таатта, Мэҥэ — Хаҥалас, Томпо, Амма, Горнай, Уус — Алдан, Чурапчы, Мииринэй уонна Дьокуускай куораттан сүүрбэттэн тахса улахан маастардар муһуннулар. Икки күн устата маастардар чороон, ох саа, кырыымпа оҥоһуутугар сатабылларын, маастарыстыбаларын көрдөрдүлэр. Горнай улууһуттан чороон күрэҕэр икки маастарбыт Артем Трофимов, Алексей Максимов, кырыымпа оҥоруутугар Игорь Аргунов кытыннылар. Күрэх түмүгүнэн чороон уонна кытыйа оҥоруутун күрэҕэр эдэр, мас ууспут Артем Трофимов муҥутуур кыайыылааҕынан тахсан үөрүүбүт муҥура суох. Алексей Максимов анал аатынан бэлиэтэннэ. Игорь Аргуновпут эмиэ ситиһиилээхтик кытынна. Санатан эттэххэ былырыын ыытыллыбыт бастакы күрэххэ Атамай нэһилиэгин маһы ыллатар ууһа Самсон Сидоров муҥутуур кыайыылааҕынан тахсыбыта. Күндү маастардарбытын улахан ситиһиинэн эҕэрдэлиибит, айымньылаах, мындыр толкуйдаах үлэҕитигэр ситиһиини, тарбаххыт талаана уҕарыйбатыгар баҕарабыт.

Анастасия Васильева, Сэмэн уонна Соппуруон Даниловтар ааттарынан Духуобунас киинин — Олоҥхо дьиэтин уус — уран салайааччыта.