Кустук тахсар Аммабар

Кулун тутар ый 3 күнүгэр, Семен уонна Софрон Даниловтар ааттарынан Духуобунас киинигэр- Олоҥхо Дьиэтигэр, Арассыыйа худуоһунньуктарын сойууһун чилиэнэ, Саха Өрөспүүбүлүкэтин култууратын туйгуна, Амма улууһун, ону тэҥэ Сулҕаччы нэһилиэгин бочуоттаах олохтооҕо, аныгы кэм биир биллэр худуоһунньуга Николай Рязанскай «Кустук тахсар Аммабар» диэн анал быыстапката үөрүүлээх быһыыга-майгыга арылынна. Аныгы олох ирдэбилинэн, Духуобунас киинэ саҥа сүүрээни киллэрэн, LED экраҥҥа искусственнай интеллект көмөтүнэн хартыыналары тыыннааҕымсытан көрдөрөн, чахчы да буолбатах түгэн буолла.
Аан дойдутааҕы суруйааччы күнүгэр, билиҥҥи кэм биллэр суруйааччыта, «Чолбон» сурунаал ааспыт сыл түмүгүнэн, Анемподист Иванович Софронов-АЛАМПА бириэмийэ проза хайысхатыгар «Саахар» сэһэнинэн лауреат үрдүк аатын сүкпүт Наталия Рязанская, убайдаатар убайын Николай Николаевич Рязанскай, олоҥхо эйгэтин көрдөрөр, талыллыбыт айымньыларыгар олоҕуран суруйбут «Удьурҕай Боотур» олоҥхо-остуоруйатын сценарийын суруйбуппун, Духуобунас киинин уус — уран салайааччыта, СӨ култууратын туйгуна Анастасия Васильева режиссердаан туруорда. Сэмэн уонна Софрон Даниловтар ааттарын сүгэр Духуобунас киинин – Олоҥхо Дьиэтин иһинэн үлэлиир «Кэнчээри» театральнай студия оҕолоро бу олоҥхо- остуоруйаҕа Удьурҕай Боотур күн сирин көрүөҕүттэн олоҕун олус үчүгэйдик оонньоон көрдөрөн, чахчы да дьон-сэргэ биһирэбилин, сэҥээриитин ылан, саала иһэ ытыс тыаһынан хабыллан олордо.
Худуоһунньугу эҕэрдэлии, үөрүүлээх түгэҥҥэ кыттыһа кэлбит дьон худуоһунньук айар үлэтигэр бэйэлэрин көрүүлэрин үллэһиннилэр. Ол курдук «Горнай улууһа» муниципальнай оройуон баһылыгын бастакы солбуйааччыта Сардаана Степановна Стручкова ааптар олоҥхо тиэмэтигэр олоҕурбут айымньыларыгар тохтоон, үйэлэри уҥуордаан кэлбит норуот айымньыта — Олоҥхону сырдатан, холустаҕа түһэрэн үйэтитэн, дьоҥҥо-норуокка туохха да кэмнэммэт сөҕүмэр үлэни сүрүннээбитин бэлиэтээтэ.
Норуот сүгүрүйэр худуоһунньуга дьон-сэргэ күннээҕи түбүгүн арыйар хартыыналара болҕомтону тардарын култуура уонна духуобунай сайдыы управлениетын салайааччыта Вероника Николаевна Быганова чопчулаан эттэ. Инникигэ эрэли, дьоһуннаах санааны кынаттыыр быыстапканы сыл инниттэн торумнаабыттарын туһунан сиһилии Сэмэн уонна Софрон Даниловтар аатын сүгэр Духуобунас киинин – Олоҥхо Дьиэтин директора, салайааччыта Александра Владимировна Алексеева кэпсээтэ. Ураты уран худуоһунньукпут, сүгүрүйэр ытык киһибит Августина Николаевна Филиппова кэлэн, кыттыыны ылан, худуоһунньук үлэтигэр бэриниитин, сөбүлүүр дьарыгын муҥура суох таптыырын үлэлэригэр көрөрүн чопчулаан ыйан, айар талаана өссө чэчирээн иһэригэр баҕа санаа бастыҥын торумнаата. Биир дойдулааҕын кэрэ тэрээһинин үөрүүтүн үллэстэ кэлбит Елизавета Иевна Мартынова, Николай Николаевич олоҕун аргыһыгар Екатерина Филипповнаҕа махтанан туран, Бэрдьигэстээххэ үүммүт кэрэ тюльпан сибэкки дьөрбөтүн бэлэх уунан, кэрэ тэрээһини ситэри симээн биэрдэ. Николай Николаевич балта Наталия Рязанская ытык-мааны дьонугар ис сүрэҕиттэн махтанан туран бэйэтин айымньыларын бэлэх уунна. Лилия Тарасова салайааччылаах «Дьиэрэй» хомус бөлөҕө хохуоралаах тыллаах, хонкунас тыастаах, холобура суох хоһоонноох, хомус барахсанынан дьүһүйүүтүнэн «Кустук тахсар Аммабар» быыстапка арыллыыта түмүктэннэ.
Түмүккэ ааптар, Николай Николаевич кэлбит ыалдьыттарга, көрөөччүлэргэ уонна Сэмэн уонна Софрон Даниловтар ааттарынан Духуобунас киинин үлэһиттэригэр ис иһиттэн махтанан туран, быыстапка үрдүк таһымнаахтык тэриллибитин бэлиэтээтэ. Быыстапка Духуобунас киинигэр кулун тутар 22 күнүгэр диэри көрдөрүүгэ туруо. «Кэлбит үтүө түгэни мүччү тутумаҥ»- диэн ыҥырабын